Tvær myndir á vegg.

       Hann stendur og starir á mynd af ungum dreng.
       Úr augum drengsins má lesa sorg,
       falda á bak við vonir og glæsta drauma.
       Augu er horfa til stjarnanna,
       augu sem endurspegla sál,
       sál er flýgur hraðar og bjartar en sólin.
       Andlit augna hans gneistar af hugrekki, orku og sakleysi.
       Lífið er hann og hann er lífið.

       Þar er einnig önnur mynd,
       mynd af manni hörkunnar og grimmdarinnar.
       Augun eru köld, dimm og tortryggin,
       þau endurvarpa ótta í hjörtu þeirra sem í þau líta.
       Hann ljómar af dulúð, krafti og deyjandi draumum.
       Hann er dauðinn og dauðinn er hann.

       Maðurinn starir á þessar tvær myndir og hugsar:
       ,, Svo ólíkar og samt svo líkar.
       Ég er þeir báðir og samt er ég hvorugur.
       Þeir voru ég og ég var þeir, en nú er ég annar.
       Ég er þriðja myndin, ég er ný kynslóð af mér."
       Hann glottir hæðinn á svip, gengur út á svalirnar,
       lætur myrkrið umvefja sig, - og horfir til stjarnanna.

                              Arnoddur Magnús Valdimarsson.

Athugasemdir

[Kristín Gunnarsdóttir, 27.4.2008 kl. 14:39]

Eitthvað svo rétt elsku Milla mín

[Tiger, 27.4.2008 kl. 16:47]

  Þetta er mjög spes lýsing. Maður getur svo mikið séð sjálfan sig svona ef maður staldrar við og spáir í ferðalag sitt frá æsku til dagsins í dag - sem og áfram. Maður hefði reyndar gott af því að stoppa augnablik af og til á lífsleiðinni til að sjá hvað er búið, hvað er að gerast og hvað er framundan. Auðvitað er framtíðin óskrifað blað í bók lífsins og okkar að skrifa það vel, með því að staldra við og hugsa - þá gætum við skrifað framhaldið mun betur en ef við bara æðum áfram hugsunarlaust.. Veit svo sem ekkert um það hvort tengja megi þessa flottu sögu svona við lífið, en hver og einn tekur því kannski eins og hann sér/les í hlutina. Knús í Sunnudaginn þinn mín kæra Milla.

[Róslín A. Valdemarsdóttir, 27.4.2008 kl. 17:50]

Rosalega er þetta skilningsríkur texti. Ég skil þetta fullkomlega.
Knús til þín elsku Milla mín

[Guðrún Emilía Guðnadóttir, 27.4.2008 kl. 19:24]

Þetta er svo mikið rétt Stína mín,

Hann Tiger túlkar þetta svo hugljúft eins og hans er vani, jú Tiger það er óhætt að tengja þessa sönnu sögu við lífið, því hún er lífið í þessu tilfelli.

Róslín mín, þú skilur þetta ég veit það.
                                  Knús kveðjur til ykkar allra
                                     Milla.

[Eva Benjamínsdóttir, 27.4.2008 kl. 20:39]

Þetta er svo fallegur texti, takk Milla mín, gott að fá svona speki og ég nýstaðin upp úr hengirúminu og get varla haldið augunum opnum. Það sækir eitthvað að mér, ég fer snemma í rúmið í kvöld. Vonandi var þetta einn dýrðardagurinn í viðbót við hina Milla mín...Ljós til þín elsku frænka kv. eva

[Guðrún Emilía Guðnadóttir, 27.4.2008 kl. 21:19]

Sömuleiðis Eva frænka mín og ljós og kærleik til þín alla tið.
                             Þín Milla.