Fyrir svefninn.

Fórum sem sagt fram í Lauga í dag, það var alveg
yndislegt, gott veður og sól í heiði.
Valgerður skólastýra setti hátíðina með frábærum hætti að vanda,
hún lýsti skólastarfi og ýmsu öðru.
Þarna voru 5-10-15 ára stúdentar og einnig útskriftarnemendur
allt upp í 70 ára. Einn talaði fyrir hvern hóp og voru það sérlega
skemmtilega sögur sem komu út úr því, allir hóparnir gáfu skólanum
gjafir, einnig nýstúdentarnir.
Á eftir fengum við kaffi og með því af miklum rausnarskap.
Áttugasta og þriðja skólaári var slitið.
Það ríkir svo mikil gleði á svona hátíðum, og allir eru eins og einn
maður allir þekkja alla, óska til hamingju og spjalla.

Heimasætan á Völlum var ráðin í vist til Þorsteins hreppstjóra.
Nú sat hún inni í baðstofu hjá foreldrum sínum,
og var móðir hennar að leggja henni ýmis heilræði,
áður en hún færi í vistina.
Að síðustu sagði hún: ,, Gættu þín svo, hróið mitt,
að hann Þorsteinn barni þig ekki."
Þá greip faðirinn fram í :
,, Já hann er manna vísastur til þess -- og þau bæði hjónin."

Sit hérna og heyri bölvað skvaldrið í imbanum, ekki unnum við
eina lagið sem var með viti af þeim sem ég heyrði.

                                   Staka.
                      Hver sem hefur góðverk gert
                      guð sinn best í slíku fann.
                      Allt er lífið einskisvert
                      ef að vantar kærleikann.

            Kveðið í skemmtiferð með Húnvetningum.

                      Húnvetningum hrós ég syng,
                      hátt á þingum Braga.
                      Ýtar slyngir aka hring
                      allt í kringum skaga.
                             
                                         Góða nótt.

Athugasemdir

[Tiger, 25.5.2008 kl. 01:51]

  Hahaha .. hreppstjórahjónin hafa greinilega verið léttlynd - ef marka á húsbóndann á Völlum.

Gott að þið áttuð ljúfan dag í dag - og vona að þið eigið líka ljúfan sunnudag á morgun. Knús á þig Milla mín.

[Sigrún Jónsdóttir, 25.5.2008 kl. 02:15]

[Guðrún Emilía Guðnadóttir, 25.5.2008 kl. 08:26]

Já Tiger míó, það hafa ætíð verið til fólk sem segir óheppilegar setningar, en þessi var nú bara saklaus.
Eigðu ljúfan dag sjálfur Tiger minn
Knús kveðjur
Milla.

[Guðrún Emilía Guðnadóttir, 25.5.2008 kl. 08:27]

Takk fyrir innlitið Sigrún mín.
Knús til þín
Milla.